சன் டிவி - சுதந்திர தின நிகழ்ச்சிகள்
பட்டிமன்றம் பார்க்கவில்லை. அரட்டை அரங்கத்திற்குள் சாலமன் பாப்பையா & இராஜா கூட்டணி நுழைந்து விட்டார்கள். தீர்ப்பில் இந்த மாத தேன்கூடு - தமிழோவியம் வலைப்பதிவர் போட்டியின் தலைப்பான உறவுகள் தோற்று நட்பு வென்று விட்டதாக நண்பர் சொன்னார்.
ஏ. ஆர். ரெஹ்மான் இயல்பாக அளவளாவினார். விஜயசாரதியின் தேர்ச்சியான கேள்விகள், பேட்டியாளர் எவ்வாறு ஆராய வேண்டும், எங்கு ஒதுங்கி பேசவைக்க வேண்டும் என்று வழக்கம் போல் சிறப்பாக இருந்தது. நூர் (YouTube - nooair) தயவில் இணையத்தில் இருக்கிறது.
விஜயசாரதி போன்ற தூண்டுகோல் இல்லாமல் பேசக்கூடியவர் ஸ்னேஹா (இன்னொருவர் பாடகர் பிரசன்னா - Music Listing - Music India OnLine). என்னவோ பேசிக் கொண்டிருந்தேயிருந்தார். கட்டியிருந்தது புடைவையா அல்லது சூரிதாரா என்று தெரியவில்லை. ஆனால், இம்புட்டு தடவை இழுத்து விடவைத்து ரொம்பவே படுத்தியது. வெகு பிடிப்பான ஆடையில் (ஹைதராபாத்??) வெயிலில் 70-களின் ரவிக்கை போல் வேர்த்து விறுவிறுத்து மடை திறந்து பேசிக் கொண்டிருந்தார்.
மாலதி, சைந்தவி, மாணிக்க விநாயகம் என்று பாடகர்கள் கலந்து கொள்ளும் நிகழ்வு எதிர்பார்த்தது போலவே அமைந்து, அலுக்கவும் வைக்காமல் ஆச்சரிய 'அட...'வும் போட முடியாமல் பசிக்கு சோளப்பொரியானது.
விஷால் கொட்டாவி கொண்டு வந்தார். 'ஜெயம்' ரவி தூக்கத்தை மேம்படுத்தினார். 'நம்ம காட்டுல மழ பெய்யுது' பத்மப்ரியாவை பார்க்க முடியாதபடி சன் டிவியிலும் ஏதோ நிகழ்ச்சி குறுக்கிட்டு சதி செய்தது.
சூர்யா உருப்படியாக, இராணுவத்திற்கு வீரர்களை வாரி வழங்கும் கிராமத்திற்கு சென்றிருக்கிறார் போல. இன்னும் பார்க்கவில்லை.
'வணக்கம் தமிழக'த்தில் சுதந்திரத்திற்கானப் பாதையின் முக்கிய மைல்கல்களை பத்து நிமிடம் தொகுத்திருந்தார்கள். விழிநீர் மல்கி, மெய் புளக அரும்பித் ததும்பிய ஆனந்தம் ஆகி, அறிவு இழந்து கரும்பின் களித்து, மொழி தடுமாறி, பித்தன் போல தரிசித்தேன். மஹாத்மாவைத் (படிக்க: பேசாப் பொருளைப் பேச நான் துணிந்தேன்: காந்தி) தவறாக உச்சரித்த மகளை (வழக்கித்திற்கு மாறாக) மிகக் கடுமையாக கண்டித்தேன். அவள் கொஞ்சம் மிரண்டு போய், அம்மாவிடம் 'இன்று அப்பா ஏன் இப்படி இருக்கு?' என்று வினவும் அளவு உணர்ச்சிவசப்பட வைத்த தமிழர்களின் சுதந்திரப் பங்களிப்பு குறித்த அருமையான விவரணக்கோப்பு.
Sun TV | Independence Day | Rehman
கருத்துரையிடுக